के दलितहरु हिन्दु होइनन् ?

30 July 2015

२०६८ को जनगणना अनुसार नेपालमा सम्पूर्ण जनसंख्याको करिब १३ प्रतिशत दलितहरु छन् । नेवारी समुदायका केही दलित बाहेक अन्य सबै दलितहरु हिन्दु धर्मावलम्बी हुन् । पछिल्लो क्रममा केही दलितहरु इसाई भएका छन्, त्यो बेग्लै कुरो हो ।
अहिले हिन्दु राज्यको माग गर्दै देशका विभिन्न स्थानमा बन्द-हड्ताल गर्ने कार्य भैरहेको छ । खासगरी राजतन्त्रको पुनः बहाली चाहने राप्रपा नेपाल र धर्मको नाममा गैह्र कानुनी कार्य गर्दै आएका कमलनयनाचार्य जस्ता केही बिबादित धर्म गुरुहरुको उ...क्साहटमा यी क्रियाकलाप हुँदै आएका छन् ।

नेपाली समाज अझै पनि अन्धबिश्वासबाट मुक्त छैन । लामो समयदेखि समाजमा जरो गाडेर बसेको वर्ण ब्यवस्थाको कारणले जतिसुकै पढा-लेखा किन नहोस्, उच्च जातको कुनै पनि ब्यक्ती दलितहरुको सन्दर्भमा नकारात्मक हुन्छन् नै । जसलाई अहिले संविधानसभा र सडकमा घटिरहेको घटनाहरुले प्रष्ट पार्छ ।
प्रायः सबै दलका, दलित सुदायबाट संविधान सभामा प्रतिनिधित्व गर्ने सभाषद्हरु मस्यौदा लेखनको क्रममा संविधान सभाले पारित गरेका दलित सम्बन्धी कतिपय प्रावधानहरु कटौती भएकोमा संविधान सभा भित्रै आक्रोशित भएर नाराबाजी गरिरहेका छन् । सदन बाहिर एक पूर्व सभाषद्ले दलित अधिकारप्रती बेवास्ता गरिए आत्मदाह गर्न समेत पछि नपर्ने बताई सकेका छन् तर बाहिर सडकमा हिन्दु राज्यको नारा लगाउनेहरुबाट हिन्दु दलितहरुको अधिकार कटौतीको बिषयमा एक शब्द बोलेका छैनन्, किन ?
कि दलितहरु हिन्दु होइनन् ? यदि दलितहरु हिन्दु होइनन् भने त ठिकै छ तर हिन्दु हुन् भने उनीहरुको अधिकारको लागि किन बोल्दैनन् हिन्दु राज्यका माग गर्दै सडकमा निस्कने धर्म गुरु र उनका अनुयायीहरु ? किन बोल्दैन्न् संविधान सभा भित्र कमल थापा र खुमबहादुर खड्काका हनुमानहरु ? के हिन्दु दलितको उत्थान, हिन्दुको उत्थान होइन ? के हिन्दु दलितले पाउने अधिकार हिन्दुले पाएको होइन ? आफ्नै समुदाय भित्रका त्यति ठूलो हिस्सालाई बेवास्ता गरेर धर्मको उत्थान होला ? यो प्रश्नको जवाफ अब खोजिनु पर्छ । यदि यो प्रश्नको जवाफ हिन्दु राज्य माग्नेहरुले दिन सकेनन् भने धर्मको खोल ओढेर गरिएको राजनीतिको असली नियत के हो त्यो प्रष्ट हुनेछ ।