प्रहरीको काम शान्ती सुरक्षा कायम गर्ने हो

16 August 2015

प्रहरीको काम शान्ती सुरक्षा कायम गर्ने हो, त्यसैले आन्दोलन वा बन्दको बेला प्रहरीहरु बढी क्रियाशिल हुनु स्वभाविक हो । तर बल प्रयोग नगर्नु पर्ने स्थानमा समेत बल प्रयोग गरेको र अन्धाधुन्ध लाठी चार्ज गरेको देख्दा प्रहरीको क्रुरता झल्कने गर्छ । लोकतन्त्रमा प्रहरीको ब्यवहार पनि मानवीय हुन आवश्यक छ ।
अर्कोतिर बन्दमा तोडफोड हुनु नेपालमा सामान्य जस्तै छ । तोडफोड गरिनु राम्रो होइन तर अहिलेकै अवस्थामा यो मनोबिज्ञानबाट नेपाली राजनीति वा समाज मुक्त हुने... देखिन्दैन। आज कसैले गरेको तोडफोडलाई नराम्रो देख्नेहरु भोलि आफैले गरेको बन्दमा सोही क्रिया दोहोर्याउँछन् ।

यस्तो बेला सवारी चालकहरु नै होसियार हुनुपर्छ । सर्वसाधारणले सवारी साधन चलाएर बन्दको अवज्ञा गरे पुलिस प्रशासन र सरकार खुशी हुने तर जब त्यो सवारी साधनमाथि आगजनी हुन्छ तब आक्रोश पोख्ने पुलिस र सरकार नै हुन्छन् ।
बन्दलाई बढावा दिनु कदाचित राम्रो काम होइन तर बन्द र तोडफोड नगरी आवाज नै नसुन्ने सरकारको रवैया अझ घातक छ । बन्द र तोडफोडको राजनीतिबाट देशले पार पाउन सबै इमान्दार र संवेदनशील हुनुपर्छ ।
अहिले चारैतिर असन्तुष्टि छ । सम्बाद र सहमतिबाट असन्तुष्ट पक्षहरुले उठाएका कतिपय माग सम्बोधन गर्न सकिन्छ । तर सरकारमा संलग्न रहेका र सोह्र बुदे सहमतिका नायकहरु असन्तुष्ट पक्षसँग वार्ता र सहमति गर्नुको साटो अझ असन्तुष्ट पक्षलाई चिढ्याउने कार्यमा निमग्न छन् । कतिपय सञ्चार माध्यमहरु अन्तरबिरोध खडा गर्न र दुई पक्षलाई भिडाउन कम्मर कसेर लागेका छन् । यस्तो संवेदनशील घडीमा पुलिस प्रशासनले अनावश्यक जोडबल गर्दा परिस्थिती झन भड्किन सक्छ । त्यसैले पुलिस प्रशासनले नेता वा मन्त्रीहरुको मात्र होइन आफ्नै बिवेकले चल्ने बेला भएको छ ।
आखिर पुलिस पनि सामान्य जनताका छोरा-छोरी नै हुन् र उनीहरुलाई पनि लोकतान्त्रिक राज्यको आधारभूत मूल्य मान्यताहरु स्थापित भएको राज्य पक्कै चाहिएको छ ।