आफू भित्रको कम्जोरी सुधार्ने कि, अरुलाई धारे हात लगाएर गाली गर्ने ?

23 July 2015

बहु जातीय, बहु भाषिक, बहु धार्मिक र बहु सांस्कृतिक राज्यमा, राजनीति र धर्म संगसंगै हिंड्न सक्दैन । यदि राज्य र धर्म सँगै भयो भने राज्यले मान्यता दिएको धर्म इतरका धार्मिक समुदायमाथि दमन हुने र जब्बरजस्ती एकल धार्मिक निर्णयहरु लादिने निश्चित छ । त्यसले समाजमा बिद्यमान वैमनस्यता र द्वन्दलाई झन् बढावा दिने छ । जसको कारण शान्ती, स्थिरता र बिकास असम्भव हुनेछ ।
धर्म निरपेक्षताको अर्थ राज्यले कुनै धर्मप्रति अनास्था... राख्ने भन्ने होइन । राज्यको नजरमा सबै धर्म बराबर हुन्छ भन्नू हो । तर यहाँ धर्मभिरुहरुबाट यसरी प्रचार गरियो कि, धर्म निरपेक्षता भनेको हिन्दु धर्मको बिरुद्धमा इसाई बाहुल्य राष्ट्रले जब्बरजस्ती लादेको नीति हो, नेपालमा धर्म निरपेक्षता कायम भयो भने हिन्दुहरु सबै इसाई हुन्छन् ।

तर यी धर्मभिरुहरुलाई किन इसाई बाहुल्य राष्ट्रहरुमा हिन्दु धर्मको प्रचार गर्न र धर्म अनुरुपको साँस्कृतिक पर्व-उत्सव मनाउन स्वतन्त्रता छ भन्ने हेक्का छैन ? अमेरिका, क्यानडा, बेलायत लगायतका स्थानमा सयौं हिन्दु मन्दिरहरु बनेका छन्, ती मन्दिरहरु बनाउन राज्यको तर्फबाट कुनै असहयोग भएको छैन । बरु आफ्नो देशमा बिस्तार भएको साँस्कृतिक बिबिधताले उनीहरुमा आत्मगौरब बढेको छ ।
साना र निर्धाहरुलाई संरक्षण गर्नु पर्छ भन्ने मान्यता मानव मात्रमा छ । सर्प जस्ता मानवलाई आघात पुर्याउने बिषालु जनावरको बच्चालाई मार्न त हाम्रो हात काँप्छ । तर धर्मको नाममा बहुमतको आधार देखाएर अरु धर्मप्रति आस्था राख्नेहरुको स्वतन्त्रतालाई कुण्ठित गर्न खोज्नु कहाँको धार्मिक नियम हो ?
देशलाई हिन्दु धर्म सापेक्ष राष्ट्र बनाउन खोज्नुको कारण यो देश हिन्दुहरुको मात्र हो, राज्यले हिन्दुहरुलाई मात्र संरक्षण गर्नु पर्छ, हिन्दु धर्मभन्दा बाहिरका धर्मावलम्बीहरुले पनि हिन्दु कानुन मान्नु पर्छ भन्न खोजिएको होइन ?
अहिलेको तथ्याङ्क जे सुकै होस्, तर नेपालमा हिन्दुहरुको आगमन हुनुभन्दा पहिलाबाट प्रकृतिबादी मान्यता राख्ने किरातहरुले आफ्नो मौलिक धार्मिक मान्यता हालसम्म जिवित राख्दै आएका छन् । हिन्दु-आर्य कुलमा नेपालमै जन्मेर बिश्वलाई नयाँ दृष्टि दिन सफल बुद्धको दर्शनलाई (धर्म) मान्ने नेपालीहरुको संख्या सानो छैन । इस्लाम र जैन धर्मावलम्बीहरु पनि यथेष्ट छन् । परापूर्व कालदेखी हिन्दु धार्मिक सम्प्रदायसँग नङ र मासुको सम्बन्ध राखेर नेपालमा रहँदै आएका यी धार्मिक समुदायलाई अहिले इसाईको हाउगुजी देखाएर हिन्दु सापेक्ष राज्यको वकालत गर्नु कति जायज हो ?
इसाईकरणको समस्या हिन्दुमा मात्र छैन बौद्ध र किरातमा पनि उतिकै छ । नेपालमा इसाईको संख्या बढ्नुमा हिन्दु भित्रको छुवाछुत, बुद्ध धर्मावलम्बीहरुमा (खासगरी तामाङ) बिद्यमान गरिबी, किरात भित्रको जँडेहा सँस्कृतिले महत्वपूर्ण भूमिका खेलेको छ । त्यसैले आफू भित्रको कमजोरी नदेखी अरुलाई गाली गर्नुको कुनै तुक छैन । हिन्दु, बुद्ध र किरातहरु इसाई बन्नुमा थोरै आर्थिक प्रलोभन र अवसरको खोजी पनि जोडिएको छ तर मूख्य कुरो यी धर्म भित्रको धार्मिक अन्धबिश्वास, कुरिती र कुसंस्कार नै हो । त्यसैले आफू भित्रको गलत पक्षलाई सुधार्नु यतिबेलाको आवश्यकता हो, धर्म सापेक्ष राज्यको माग वा धर्म सापेक्षताले इसाईकरण रोकिनेवाला छैन ।
अन्त्यमा हिन्दुधर्म सापेक्ष राज्यका माग गर्ने मित्रहरुलाई यहि भन्न चाहान्छु,,,,,आफू भित्रको कम्जोरी सुधार्ने कि, अरुलाई धारे हात लगाएर गाली गर्ने ?